Ўзбекистон Республикаси Вазирлар Маҳкамасининг
қарори
Қонун ҳужжатларининг тадбиркорлик фаолиятига таъсирини баҳолаш тизимини жорий этиш чора-тадбирлари тўғрисида
Ўзбекистон Республикаси Президентининг «Ўзбекистон Республикасида инвестиция иқлими ва ишбилармонлик муҳитини янада такомиллаштиришга доир қўшимча чора-тадбирлар тўғрисида» 2014 йил 7 апрелдаги ПФ-4609-сон Фармонига мувофиқ, шунингдек Ўзбекистон Республикасининг Интерактив давлат хизматлари ягона порталида қонун ҳужжатларини муҳокама қилиш учун шароит яратиш орқали уларнинг тадбиркорлик фаолиятига таъсирини баҳолаш тизимини янада такомиллаштириш мақсадида Вазирлар Маҳкамаси қарор қилади:
1. 2015 йил 1 январдан бошлаб шундай тартиб ўрнатилсинки, унга мувофиқ:
тадбиркорлик фаолиятини амалга оширишга таъсир этадиган ишлаб чиқилаётган норматив-ҳуқуқий ҳужжатлар лойиҳалари ва қабул қилинган норматив-ҳуқуқий ҳужжатлар тегишли лойиҳа ва қабул қилинган норматив-ҳуқуқий ҳужжатни ишлаб чиқувчилар — давлат ва хўжалик бошқаруви органлари, маҳаллий давлат ҳокимияти органлари томонидан Ўзбекистон Республикасининг Интерактив давлат хизматлари ягона порталида муҳокама қилиш ва тадбиркорлик фаолиятига таъсирини баҳолаш учун жойлаштирилади;
муҳокама иштирокчилари томонидан берилган таклифлар тегишли лойиҳа ва қабул қилинган норматив-ҳуқуқий ҳужжатни ишлаб чиқувчилар — давлат ва хўжалик бошқаруви органлари, маҳаллий давлат ҳокимияти органлари томонидан кўриб чиқилиши шарт.
2. Ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона портали орқали баҳолаш тартиби тўғрисидаги Низом иловага мувофиқ тасдиқлансин.
Олдинги таҳрирга қаранг.
3. Ўзбекистон Республикаси Ахборот технологиялари ва коммуникацияларини ривожлантириш вазирлиги Ўзбекистон Республикаси Савдо-саноат палатаси, Адлия вазирлиги ҳамда бошқа манфаатдор вазирликлар ва идоралар билан биргаликда:
(3-банднинг биринчи хатбошиси Ўзбекистон Республикаси Вазирлар Маҳкамасининг 2015 йил 27 июндаги 171-сонли қарори таҳририда — ЎР ҚҲТ, 2015 й., 26-сон, 338-модда)
2015 йил 1 январгача бўлган муддатда Ўзбекистон Республикасининг Интерактив давлат хизматлари ягона порталида ишлаб чиқилаётган норматив-ҳуқуқий ҳужжатлар лойиҳаларини ва қабул қилинган норматив-ҳуқуқий ҳужжатларни муҳокама қилиш ва тадбиркорлик фаолиятига таъсирини баҳолаш бўйича махсус бўлим ишлашини таъминласин;
Ўзбекистон Республикасининг Интерактив давлат хизматлари ягона порталидаги махсус бўлимни техник жиҳатдан доимий қўллаб-қувватлашни амалга оширсин.
Олдинги таҳрирга қаранг.
4. Ўзбекистон Республикаси Савдо-саноат палатасига Ўзбекистон Республикаси Ахборот технологиялари ва коммуникацияларини ривожлантириш вазирлиги ҳамда Адлия вазирлиги билан биргаликда тадбиркорлик субъектлари ва аҳоли ўртасида мазкур қарорнинг мақсадлари, мазмуни ва амалий аҳамиятини кенг ёритиш тадбирларини ташкил этиш ва ўтказиш тавсия этилсин.
(4-банд Ўзбекистон Республикаси Вазирлар Маҳкамасининг 2015 йил 27 июндаги 171-сонли қарори таҳририда — ЎР ҚҲТ, 2015 й., 26-сон, 338-модда)
5. Ўзбекистон Республикаси Адлия вазирлиги мазкур қарорнинг давлат ва хўжалик бошқаруви органлари, маҳаллий давлат ҳокимияти органлари томонидан бажарилиши ва сифати бўйича мувофиқлаштиришни ҳамда мониторинг олиб боришни, шунингдек заруратга кўра қонун ҳужжатлари таъсирини баҳолаш тизимини янада такомиллаштириш бўйича таклифларнинг Ўзбекистон Республикаси Вазирлар Маҳкамасига киритилишини таъминласин.
6. Вазирликлар ва идоралар ўзлари қабул қилган норматив-ҳуқуқий ҳужжатларни бир ой муддатда мазкур қарорга мувофиқлаштирсинлар.
7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.
Ўзбекистон Республикасининг Бош вазири Ш. МИРЗИЁЕВ
Тошкент ш.,
2014 йил 2 декабрь,
328-сон
Вазирлар Маҳкамасининг 2014 йил 2 декабрдаги 328-сон қарорига
ИЛОВА
Ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона портали орқали баҳолаш тартиби тўғрисида
НИЗОМ
I. Умумий қоидалар
1. Ушбу Низом ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона порталида (кейинги ўринларда Ягона портал деб аталади) уларни муҳокама қилиш йўли билан баҳолаш тартибини белгилайди.
2. Ушбу Низомда қуйидаги тушунчалардан фойдаланилади:
жадвал — норматив-ҳуқуқий ҳужжатни ишлаб чиқиш, муҳокама қилиш ва киритиш (қабул қилиш)нинг барча босқичларини амалга оширишни ҳамда аниқ муддатларини назарда тутадиган, ишлаб чиқувчи томонидан тасдиқланган режа-жадвал;
норматив-ҳуқуқий ҳужжат — Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари, вазирликлар, давлат қўмиталари ва идораларнинг буйруқлари ва қарорлари, шунингдек маҳаллий давлат ҳокимияти органларининг қарорлари;
норматив-ҳуқуқий ҳужжатни муҳокама қилиш — тегишли норматив-ҳуқуқий ҳужжат лойиҳасини ёки қабул қилинган норматив-ҳуқуқий ҳужжатни ва бошқа зарур маълумотларни Ягона порталга жойлаштириш, шунингдек муҳокама иштирокчиларининг тақдим этилган таклифларни ишлаб чиқилаётган норматив-ҳуқуқий ҳужжат лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини баҳолаш учун умумлаштириш ва кўриб чиқиш;
ишлаб чиқувчилар — тегишли норматив-ҳуқуқий ҳужжат лойиҳасини ёки қабул қилинган норматив-ҳуқуқий ҳужжатни ишлаб чиққан давлат ва ҳўжалик бошқаруви органлари, маҳаллий давлат ҳокимияти органлари;
муҳокама иштирокчилари — Ягона порталда жойлаштирилган ишлаб чиқилган норматив-ҳуқуқий ҳужжат лойиҳаси ёки қабул қилинган норматив-ҳуқуқий ҳужжат юзасидан таклифлар тақдим этган юридик ва жисмоний шахслар.
3. Қуйидагилар ишлаб чиқилаётган норматив-ҳуқуқий ҳужжат лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини баҳолашнинг мақсадлари ҳисобланади:
муаммони, уни тартибга солишнинг мақсади ва мавжуд ечимини таҳлил қилиш орқали норматив-ҳуқуқий ҳужжатни қабул қилишда вужудга келиши мумкин бўлган (вужудга келган) ижобий ва салбий оқибатларни аниқлаш;
ишлаб чиқилаётган норматив-ҳуқуқий ҳужжат лойиҳасида ва қабул қилинган норматив-ҳуқуқий ҳужжатда давлат ҳокимияти ва бошқаруви органлари тизимида коррупция, бошқа ҳуқуқбузарликлар содир этилиши учун шароит яратадиган, тадбиркорлик субъектлари учун ортиқча маъмурий ҳамда бошқа чекловларни жорий этадиган ёки жорий этишга шароит яратадиган қоидаларни аниқлаш;
тадбиркорлик субъектларида асоссиз харажатлар пайдо бўлишига олиб келувчи қоидаларни аниқлаш.
4. Қуйидагиларни:
а) тадбиркорлик субъектларига янги чекловлар ва янги турдаги рухсат бериш тартиб-таомиллари, лицензиялар жорий қилиш ёки мавжуд чеклов, рухсат бериш тартиб-таомиллари ва лицензияланадиган фаолият турларини тадбиркорлик субъектларининг янада кенгроқ доирасига татбиқ қилишни;
б) рухсат этиш хусусиятига эга ҳужжатларни ёки лицензияларни олиш учун қўшимча талаблар ва шартларни жорий этишни;
в) тадбиркорлик субъектлари томонидан анча харажатлар қилишга олиб келиши мумкин бўлган талаблар (шартлар)ни жорий этишни;
г) тадбиркорлик субъектлари — юридик шахслар устав капиталининг энг кам миқдорига нисбатан талабларни оширишни;
д) тегишли соҳадаги тадбиркорлик субъектларининг 30 ва ундан ортиқ фоизининг ҳуқуқ ва қонуний манфаатларига таъсир кўрсатишни;
е) тадбиркорлик субъектларининг белгиланган ҳуқуқларини қисқартириш (камайтириш) ёки қўшимча мажбуриятлар жорий қилишни;
ж) тадбиркорлик субъектлари учун янги турдаги жавобгарлик чораларини жорий қилишни;
з) тадбиркорлик субъектларига солиқлар ва бошқа мажбурий тўловлар бўйича имтиёзлар ва бошқа турдаги имтиёз, кафолат ва преференцияларни белгилашни, шунингдек тадбиркорлик субъектларига янги ҳуқуқлар беришни назарда тутувчи ишлаб чиқилаётган норматив-ҳуқуқий ҳужжат лойиҳалари муҳокама қилиниши ва уларнинг тадбиркорлик фаолиятига таъсири баҳоланиши керак.
5. Қабул қилинган норматив-ҳуқуқий ҳужжатларни баҳолаш улар тартибга соладиган тегишли йўналиш ва масалаларни янада такомиллаштириш, тадбиркорлик фаолиятининг ривожланишига тўсқинлик қилаётган омилларни бартараф этиш, шунингдек тадбиркорлик фаолиятини амалга ошириш учун рухсат бериш тартиб-таомилларини соддалаштириш ва қисқартириш мақсадида:
қабул қилинган норматив-ҳуқуқий ҳужжатнинг ишлаб чиқувчилари ташаббуси билан;
тадбиркорлик субъектлари бирлашмаларининг таклифларига асосан;
давлат ва бошқа ваколатли органларнинг ўз ваколати доирасига киритилган тегишли йўналиш ва масалалар юзасидан таклифлари, шунингдек улар томонидан тартибга солинадиган масалалар бўйича тадбиркорлик субъектларининг асослантирилган жамоавий мурожаати;
Ўзбекистон Республикаси Олий Мажлиси палаталарининг, Ўзбекистон Республикаси Президентининг ва Ўзбекистон Республикаси Вазирлар Маҳкамасининг тегишли топшириқлари асосида амалга оширилиши мумкин.
6. Қуйидаги:
давлат сирларини ёки қонун билан қўриқланадиган бошқа сирни ўз ичига олган;
фавқулодда вазиятларнинг олдини олиш ёки уларнинг оқибатларини бартараф этиш мақсадида қабул қилинадиган;
ижтимоий-иқтисодий ривожланиш дастурларини амалга оширишга йўналтирилган;
амалдаги қонунчилик қоидаларини янги қабул қилинган норматив-ҳуқуқий ҳужжатларга мувофиқлаштириш бўйича;
мазкур Низомнинг 4-бандида кўрсатилган мезонларга жавоб бермайдиган норматив-ҳуқуқий ҳужжатлар лойиҳаларининг тадбиркорлик фаолиятига таъсири баҳоланмайди.
7. Ишлаб чиқилаётган норматив-ҳуқуқий ҳужжат лойиҳасининг ёки қабул қилинган норматив-ҳуқуқий ҳужжатнинг тадбиркорлик фаолиятига таъсирини баҳолаш мақсадида муҳокама қилиш жараёни бўйича ташаббус билан чиқиш, шунингдек муҳокама иштирокчиларининг таклифларини умумлаштириш ва кўриб чиқиш тегишли ишлаб чиқувчилар томонидан ўзлари тасдиқлаган жадвал асосида:
ишлаб чиқилаётган норматив-ҳуқуқий ҳужжатлар лойиҳалари бўйича — мазкур Низомнинг 1-иловасига мувофиқ;
қабул қилинган норматив-ҳуқуқий ҳужжатлар бўйича — мазкур Низомнинг 2-иловасига мувофиқ схемалар бўйича амалга оширилади.
II. Норматив-ҳуқуқий ҳужжатни муҳокама қилиш тўғрисида хабарнома
8. Ишлаб чиқилаётган норматив-ҳуқуқий ҳужжат лойиҳасининг муҳокамаси унинг манфаатдор вазирликлар ва идоралар билан келишиш жараёни бошланишидан олдин — мажбурий тарзда, қабул қилинган норматив-ҳуқуқий ҳужжат муҳокамаси эса — у кучга киргандан сўнг камида бир йилдан кейин ўтказилади.
9. Ишлаб чиқилаётган норматив-ҳуқуқий ҳужжат лойиҳасини ёки қабул қилинган норматив-ҳуқуқий ҳужжатни муҳокама қилиш учун ишлаб чиқувчи Ягона порталда муҳокама ўтказиш ҳақидаги хабарни, жадвални, таъсири баҳоланаётган норматив-ҳуқуқий ҳужжат лойиҳасини ёки қабул қилинган норматив-ҳуқуқий ҳужжатни, шунингдек муҳокама иштирокчилари учун сўровномани жойлаштиради.
Муҳокама иштирокчилари учун сўровнома намунавий шаклларда:
ишлаб чиқилаётган норматив-ҳуқуқий ҳужжат лойиҳаси учун — мазкур Низомнинг 3-иловасига мувофиқ;
қабул қилинган норматив-ҳуқуқий ҳужжат учун — мазкур Низомнинг 4-иловасига мувофиқ жойлаштирилади.
10. Муҳокама ўтказиш тўғрисидаги хабарномада қуйидаги маълумотлар бўлиши керак:
а) ишлаб чиқилаётган норматив-ҳуқуқий ҳужжатлар лойиҳалари учун:
лойиҳани қабул қилиш заруратининг асоси;
лойиҳанинг тури, номи ва режалаштирилаётган кучга кириш муддати;
ишлаб чиқувчи тўғрисида маълумот;
ишлаб чиқувчи томонидан норматив-ҳуқуқий ҳужжат лойиҳаси бўйича таклифларни қабул қилиш муддати, бунда ушбу муддат хабарнома Ягона порталда жойлаштирилган кундан бошлаб 15 кундан кам бўлиши мумкин эмас;
б) қабул қилинган норматив-ҳуқуқий ҳужжат учун:
норматив-ҳуқуқий ҳужжатни баҳолаш орқали ҳал қилиниши ёки ўрганиб чиқилиши керак бўлган муаммо (масала)нинг тавсифи;
ишлаб чиқувчи тўғрисида маълумот;
ишлаб чиқувчи томонидан норматив-ҳуқуқий ҳужжат бўйича таклифларни қабул қилиш муддати, бунда ушбу муддат хабарнома Ягона порталда жойлаштирилган кундан бошлаб 15 кундан кам бўлиши мумкин эмас.
Хабарномага, ишлаб чиқувчининг фикрича, норматив-ҳуқуқий ҳужжат лойиҳасига ёки қабул қилинган норматив-ҳуқуқий ҳужжатга оид бошқа маълумотларга тегишли бўлган ахборот ҳам киритилиши мумкин.
III. Муҳокамаларни ўтказиш ва таклифларни умумлаштириш
11. Муҳокама қилинаётган норматив-ҳуқуқий ҳужжат лойиҳаси ёки қабул қилинган норматив-ҳуқуқий ҳужжат бўйича таклифлар муҳокама иштирокчилари томонидан Ягона порталда мазкур Низомнинг 9-бандига мувофиқ жойлаштирилган сўровномаларни тўлдириш йўли билан тақдим этилади.
12. Муҳокама иштирокчилари сўровномаларда кўрсатилмаган масалалар бўйича ҳам ўзларининг асослантирилган таклифларини ихтиёрий шаклда билдиришлари мумкин.
13. Муҳокама иштирокчилари томонидан муҳокама предметига оид бўлмаган, асослантирилмаган ва аниқ ифодаланмаган, шунингдек хабарномада кўрсатилган муддатдан сўнг тақдим қилинган таклифлар ишлаб чиқувчилар томонидан кўриб чиқилмайди.
14. Ишлаб чиқувчилар муҳокама иштирокчиларининг тушган таклифларини умумлаштиради ва қабул қилинганлиги тўғрисидаги тегишли маълумотни, агар рад этилган бўлса — асослантирилган сабабни Ягона порталда жойлаштиради.
15. Тушган таклифлар, уларнинг қабул қилинганидан ёки рад этилганидан қатъи назар, Ягона порталда жойлаштирилган ҳолда қолдирилиши ва чекланмаган доирада, шу жумладан норматив-ҳуқуқий ҳужжат лойиҳасининг келишувини амалга оширган вазирликлар ва идоралар учун ҳам танишиб чиқиш учун очиқ бўлиши керак.
IV. Ўтказилган муҳокамалар натижаларини инобатга олиш
16. Норматив-ҳуқуқий ҳужжат лойиҳаси бўйича муҳокама иштирокчиларининг таклифларини инобатга олиш ишлаб чиқувчилар томонидан лойиҳани қабул қилинган таклифларга мувофиқ қайта ишлаш орқали ва жадвалда белгиланган муддатларда амалга оширилади. Бунда лойиҳани қайта ишлаш муддати муҳокама тугаганидан сўнг 30 кундан ошмаслиги керак.
17. Ишлаб чиқувчилар қайта ишлаб чиқилган норматив-ҳуқуқий ҳужжат лойиҳасини ахборот тариқасида Ягона порталга такроран жойлаштирадилар.
Бунда Ягона порталда такроран жойлаштирилган лойиҳа муҳокама натижасида қайта ишланган ёки лойиҳага киритилган бандларга, шунингдек уларни тақдим қилган муҳокама иштирокчилари ҳақида тегишли ахборотга ҳаволалар билан жойлаштирилиши керак.
18. Қайта ишланган норматив-ҳуқуқий ҳужжат лойиҳаси уни Ягона порталда қайта жойлаштириш билан бир вақтда манфаатдор вазирликларга ва идораларга белгиланган тартибда келишиш учун юборилади.
19. Қабул қилинган норматив-ҳуқуқий ҳужжатлар бўйича муҳокама иштирокчиларининг таклифларини инобатга олиш тегишли норматив-ҳуқуқий ҳужжат лойиҳаси, шу жумладан муҳокама қилинаётган норматив-ҳуқуқий ҳужжатга ўзгартириш ва қўшимчалар киритиш бўйича лойиҳа ишлаб чиқиш йўли билан амалга оширилади.
Норматив-ҳуқуқий ҳужжат лойиҳасини ишлаб чиқиш қабул қилинган таклифларга мувофиқ ва тасдиқланган жадвалда белгиланган муддатларда амалга оширилади. Бунда лойиҳани ишлаб чиқиш муддати муҳокама тугаганидан сўнг 30 кундан ошмаслиги керак.
20. Ишлаб чиқилган лойиҳа муҳокама ўтказиш ва ушбу Низомда назарда тутилган бошқа тартиботларни амалга ошириш учун Ягона порталда жойлаштирилади.
21. Ўтказилган муҳокама ва унинг натижалари мажбурий тарзда норматив-ҳуқуқий ҳужжат лойиҳасига тушунтириш хатида (идоравий норматив-ҳуқуқий ҳужжатлар, маҳаллий давлат органлари қарорлари тайёрланганда — юридик хизмат маълумотномасида) акс эттирилиши керак.
V. Якунловчи қоидалар
22. Киритилиши, қабул қилиниши ёки кучга киришининг аниқ муддати белгиланган норматив-ҳуқуқий ҳужжатлар лойиҳалари ишлаб чиқилганда ушбу Низомнинг 10, 16 ва 19-бандларида кўрсатилган муддатлар ўзгартирилиши мумкин.
Бунда тасдиқланган жадвалларда кўрсатилган муддатлар норматив-ҳуқуқий ҳужжатларнинг киритилиши, қабул қилиниши ёки кучга киришининг белгиланган аниқ муддатига мувофиқ бўлиши лозим.
23. Ишлаб чиқилаётган норматив-ҳуқуқий ҳужжат лойиҳаси ёки қабул қилинган норматив-ҳуқуқий ҳужжат бўйича ўтказилган муҳокама материаллари, шу жумладан улар бўйича келиб тушган таклифлар, муҳокама тугаганидан сўнг 3 йил мобайнида Ягона порталда сақланиши ва чекланмаган доирада танишиб чиқиш учун очиқ бўлиши керак.
24. Ишлаб чиқувчининг раҳбари ушбу Низом талабларига мувофиқ ишлаб чиқилаётган норматив-ҳуқуқий ҳужжат лойиҳасининг ёки қабул қилинган норматив-ҳуқуқий ҳужжатнинг муҳокама қилиш учун Ягона порталга жойлаштирилиши, муҳокама иштирокчилардан келиб тушган таклифларнинг кўриб чиқилиши ва уларнинг қабул қилингани ёки рад этилгани тўғрисидаги ахборотнинг жойлаштирилиши учун шахсан жавобгар ҳисобланади.
Ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона портали орқали баҳолаш тартиби тўғрисида низомга
1-ИЛОВА
Ишлаб чиқилаётган норматив-ҳуқуқий ҳужжат лойиҳасининг муҳокамасини ўтказиш
СХЕМАСИ
Изоҳ: киритилиши, қабул қилиниши ёки кучга киришининг аниқ муддатлари белгиланган норматив-ҳуқуқий ҳужжатлар лойиҳалари ишлаб чиқилганда кўрсатилган муддатлар ўзгартирилиши мумкин.
Ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона портали орқали баҳолаш тартиби тўғрисида низомга
2-ИЛОВА
Қабул қилинган норматив-ҳуқуқий ҳужжатнинг муҳокамасини ўтказиш
СХЕМАСИ
Изоҳ: киритилиши, қабул қилиниши ёки кучга киришининг аниқ муддатлари белгиланган норматив-ҳуқуқий ҳужжатлар лойиҳалари ишлаб чиқилганда кўрсатилган муддатлар ўзгартирилиши мумкин.
Ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона портали орқали баҳолаш тартиби тўғрисида низомга
3-ИЛОВА

Ишлаб чиқилаётган норматив-ҳуқуқий ҳужжат
лойиҳалари муҳокамаси иштирокчилари учун
СЎРОВНОМА

Боғланиш учун ахборот:

Ташкилотнинг номи
(жисмоний шахснинг Ф.И.О.):________________________________
Ташкилотнинг фаолият соҳаси:________________________________
Боғланиладиган шахснинг Ф.И.О.:________________________________
Боғланиш телефони рақами:________________________________
Электрон почта манзили:________________________________

1. Фикрингизча, таклиф қилинаётган лойиҳа қандай муаммони ҳал этишга қаратилган? Ушбу муаммо бугунги кунда ҳам долзарбми?
________________________________________________________________________
________________________________________________________________________


2. Норматив-ҳуқуқий ҳужжат лойиҳасини ишлаб чиқувчи давлат аралашуви заруратини талаб қилувчи омилларни қанчалик тўғри аниқлаган? Таклиф этилаётган тартибга солишнинг мақсади тартибга солиш орқали ҳал этилиши лозим бўлган муаммо билан қанчалик боғлиқ? Сизнинг фикрингизча, норматив-ҳуқуқий тартибга солиш унинг олдига қўйилган мақсадларга эришадими?
________________________________________________________________________
________________________________________________________________________


3. Муаммони ҳал этишнинг танланган йўли мақбулми (шу жумладан, тадбиркорлик субъектлари учун фойдаси ва зарари нуқтаи назаридан)? Давлат томонидан тартибга солишдан кўзланган мақсадга эришишнинг бошқача варианти мавжудми? Агар мавжуд бўлса, улардан, Сизнингча, янада кам харажатлиси ва (ёки) самаралироғи борми?
________________________________________________________________________
________________________________________________________________________


4. Сизнингча, таклиф этилаётган тартибга солиш қайси тадбиркорлик фаолияти субъектларига дахлдор (субъектлар турлари ва соҳалар бўйича, Сизнинг шаҳар ёки вилоятингиздаги, туманингиздаги сони)?
________________________________________________________________________ ________________________________________________________________________


5. Таклиф этилаётган тартибга солишни жорий қилиш соҳадаги рақобат муҳитига ўз таъсирини кўрсатадими, соҳада кучлар тақсимотининг асоссиз равишда ўзгаришига олиб келадими? Агар ўзгартирса, қандай қилиб? Имконият даражасида миқдорий кўрсаткичларни келтириб ўтинг.
________________________________________________________________________ ________________________________________________________________________


6. Давлат томонидан тартибга солиш субъектларининг мажбуриятлари, жавобгарлиги қанчалик тўлиқ ва аниқ ифодаланган, шунингдек масъул давлат органлари томонидан амалга ошириладиган маъмурий тартиботлар қанчалик тушунарли ёзилган, ҳокимият функциялари ва ваколатлари қанчалик аниқ ва ҳар хил, тушунилмайдиган тарзда ёзилганлигига баҳо беринг. Таклиф этилаётган нормалар бошқа норматив-ҳуқуқий ҳужжатларга мувофиқ эмас ёки зид деб ўйлайсизми? Агар шундай бўлса, бундай нормалар ва норматив-ҳуқуқий ҳужжатларни кўрсатиб ўтинг.
________________________________________________________________________ ________________________________________________________________________


7. Таклиф этилаётган норматив-ҳуқуқий ҳужжат лойиҳасида давлат ҳокимияти ва бошқаруви органлари тизимида коррупция, бошқа ҳуқуқбузарликлар содир этилиши учун шароит яратадиган, шунингдек тадбиркорлик субъектлари учун ортиқча маъмурий ҳамда бошқа чекловларни жорий этадиган ёки жорий этишга шароит яратадиган, шунингдек тадбиркорлик субъектларининг асоссиз харажатлари юзага келишига олиб келувчи қоидалар борми? Ҳар бир кўрсатилган қоида бўйича асослаб беринг.
________________________________________________________________________ ________________________________________________________________________


8. Сизнингча, мазкур норматив-ҳуқуқий ҳужжат лойиҳасида белгиланаётган талаб ва нормалар ижросини назорат қилиш билан боғлиқ қандай муаммо ва қийинчиликлар вужудга келиши мумкин? Унда тадбиркорлик субъектларини ҳимоя қилиш механизми назарда тутилганми?
________________________________________________________________________ ________________________________________________________________________


9. Таклиф этилаётган тартибга солиш кучга кириши учун ўтиш даври талаб қилинадими (агар талаб қилинса, унинг муддати қанча), янги тартибга солиш киритилишида муддат бўйича қандай чекловларни инобатга олиш лозим?
________________________________________________________________________ ________________________________________________________________________


10. Сизнингча, айрим гуруҳ шахсларига нисбатан тартибга солишни жорий этишда қандай истисноларни қўллаш мақсадга мувофиқ? Тегишли асосларни келтириб ўтинг.
________________________________________________________________________ ________________________________________________________________________


11. Ваколатли орган томонидан аниқлаштирилиши зарур бўлган кўриб чиқилаётган норматив-ҳуқуқий ҳужжат лойиҳасининг аниқ қоида ва нормаларига оид махсус саволлар.
________________________________________________________________________ ________________________________________________________________________


12. Тартибга солиш таъсирини баҳолаш доирасида, Сизнинг фикрингизча, инобатга олиниши мақсадга мувофиқ бўлган бошқа таклиф ва эътирозлар.
________________________________________________________________________ ________________________________________________________________________

Ишлаб чиқилаётган норматив-ҳуқуқий ҳужжатлар лойиҳаларининг ва қабул қилинган норматив-ҳуқуқий ҳужжатларнинг тадбиркорлик фаолиятига таъсирини Ўзбекистон Республикасининг Интерактив давлат хизматлари ягона портали орқали баҳолаш тартиби тўғрисида низомга
4-ИЛОВА

Қабул қилинган норматив-ҳуқуқий ҳужжатларнинг
муҳокамаси иштирокчиларининг
СЎРОВНОМАСИ

Боғланиш учун ахборот:

Ташкилотнинг номи
(жисмоний шахснинг Ф.И.О.):________________________________
Ташкилотнинг фаолият соҳаси:________________________________
Боғланиладиган шахснинг Ф.И.О.:________________________________
Боғланиш телефони рақами:________________________________
Электрон почта манзили:________________________________

1. Норматив-ҳуқуқий ҳужжатнинг тартибга солиш мақсади ушбу норматив-ҳуқуқий ҳужжат билан ҳал этилиши лозим бўлган муаммо билан қанчалик боғлиқ? Сизнинг фикрингизча, норматив-ҳуқуқий тартибга солиш унинг олдига қўйилган мақсадларга эришдими?
________________________________________________________________________ ________________________________________________________________________


2. Муаммони ҳал этишнинг танланган йўли мақбулми (шу жумладан, умуман, жамият учун фойдаси ва зарари нуқтаи назаридан)? Давлат томонидан тартибга солишдан кўзланган мақсадга эришишнинг бошқача варианти мавжудми? Агар мавжуд бўлса, улардан, Сизнингча, янада кам харажатлиси ва (ёки) самаралироғини белгиланг?
________________________________________________________________________
________________________________________________________________________


3. Тартибга солишни жорий этиш соҳадаги рақобат муҳитига ўз таъсирини кўрсатдими, соҳада кучлар тақсимотининг асоссиз равишда ўзгаришига олиб келдими? Агар шундай бўлса, қандай қилиб? Имконият даражасида миқдорий кўрсаткичларни келтириб ўтинг.
________________________________________________________________________
________________________________________________________________________


4. Давлат томонидан тартибга солиш субъектларининг мажбуриятлари, жавобгарлиги қанчалик тўлиқ ва аниқ ифодаланган, шунингдек масъул давлат органлари томонидан амалга ошириладиган маъмурий тартиботлар қанчалик тушунарли ёзилган, ҳокимият функциялари ва ваколатлари қанчалик аниқ ва ҳар хил, тушунилмайдиган тарзда ёзилганлигига баҳо беринг.
________________________________________________________________________ ________________________________________________________________________


5. Норматив-ҳуқуқий ҳужжатда давлат ҳокимияти ва бошқаруви органлари тизимида коррупция, бошқа ҳуқуқбузарликлар содир этилиши учун шароит яратадиган, шунингдек тадбиркорлик субъектлари учун ортиқча маъмурий ҳамда бошқа чекловларни жорий этадиган ёки жорий этишга шароит яратадиган, шунингдек тадбиркорлик субъектларининг асоссиз харажатлари юзага келишига олиб келувчи қоидалар борми? Ҳар бир кўрсатилган қоида бўйича асослаб беринг.
________________________________________________________________________ ________________________________________________________________________


6. Сизнингча, мазкур норматив-ҳуқуқий ҳужжатда назарда тутилган талаб ва нормалар ижросини назорат қилиш билан боғлиқ қандай муаммо ва қийинчиликлар вужудга келмоқда?
________________________________________________________________________ ________________________________________________________________________


7. Сизнингча, айрим гуруҳ шахсларига нисбатан тартибга солишни жорий этишда қандай истисноларни қўллаш мақсадга мувофиқ? Тегишли асосни келтиринг.
________________________________________________________________________ ________________________________________________________________________


8. Тартибга солиш таъсирини баҳолашда, Сизнинг фикрингизча, инобатга олиниши мақсадга мувофиқ бўлган бошқа таклиф ва эътирозлар.
________________________________________________________________________ ________________________________________________________________________


(Ўзбекистон Республикаси қонун ҳужжатлари тўплами, 2014 й., 49-сон, 581-модда; 2015 й., 26-сон, 338-модда)